അലമാര

പുതിയ അലമാര വാങ്ങിയ
ആഘോഷത്തിനിടെ
അവജ്ഞയോടെ നോക്കി പഴയതിനെ
പുസ്തകങ്ങള്‍ പുറത്തെടുത്തടുക്കിവെക്കെ
പൊക്കമവക്ക് തന്നേക്കാളെത്രയോ!

പുതിയ സ്‌ഫടികശോഭക്കൂട്ടില്‍
കാഴ്ചപ്പണ്ടങ്ങളാകാന്‍
വിധികാത്തൊരിക്കല്‍ കൂടിയവ
അകത്തെ വിഴുപ്പുമാറാലകള്‍
വകഞ്ഞിത്തിരി വെട്ടമണയും മുമ്പ്
കൂട്ടിലടച്ചുവെച്ചുമറന്നവ
ചിന്തയുടെ തിരി തെളിയും മുമ്പ്
തല്ലിക്കെടുത്തി ഒളിച്ചുവെച്ചവ

പുറംചട്ടയുടെ പുളപ്പില്‍ മയങ്ങി
അരിക്കാശ് തുലച്ച് വാങ്ങിയവ
ലോലസമവാക്യങ്ങളെ പരതിശപിച്ച്
വലിച്ചെറിഞ്ഞ് കളഞ്ഞവ

വായിച്ച് വായിച്ചുറക്കിയതിന് പിന്നെ
മറവിയിലേക്ക് ഊര്‍‌ന്ന് പോയവ
വലിയതെന്ന വകവെപ്പില്‍
വായിച്ചുതീരെ ചെറുതായിപ്പോയവ

വലിഞ്ഞുകയറിയ ചിതലുകള്‍ തിന്ന്
അര്‍ഥലോഭം ഭവിച്ച വാക്കുകള്‍ പേറുന്നവ
അടിവരയിട്ട വരികള്‍ക്കിടയില്‍ നിന്ന്
നെരിപ്പോട് കടഞ്ഞ ചിന്തകള്‍ തന്നവ
വീര്യമുടുത്ത ശബ്ദങ്ങളാല്‍
മുഷ്ടി ചുഴറ്റിയ ഭാവനകള്‍ നെയ്തവ

അസുഖകരസ്മരണകള്‍ പോലെ
അടര്‍ന്നൊഴിയാന്‍ വെമ്പും
പാവുതകര്‍ന്നേടുകള്‍ ഭാരമായവ

ആയുസ്സിലേറെയും കുടിച്ചുതീര്‍ത്തവ
ഇനിയും പൊടിതട്ടിയെടുത്തുവെക്കണം!

10 അഭിപ്രായങ്ങൾ:

  1. കവിത നന്നായിട്ടുണ്ട്

    മറുപടിഇല്ലാതാക്കൂ
  2. നല്ല വരികള്‍ നല്ല അവതരണം.......

    മറുപടിഇല്ലാതാക്കൂ
  3. ചിന്തയുടെ തിരി തെളിയും മുമ്പ്

    തല്ലിക്കെടുത്തി ഒളിച്ചുവെച്ചവ



    എന്റെ ഭ്രാന്താണ് പുസ്തകങ്ങള്‍.... അലമാരകളിലും ചിന്തകളിലും അവ നിറയട്ടെ....

    മറുപടിഇല്ലാതാക്കൂ
  4. പ്രിയ സുഹൃത്തേ,താങ്കളുടെ ബ്ലോഗു നന്നായി ശ്രദ്ധിക്കാന്‍ തുടങ്ങിയത് ഞാനൊരു ബ്ലോഗു'പണിതതി'നുശേഷമാണ്..നന്നായി-താങ്കളുടെ ബ്ലോഗും രചനകളും.ഇനി ഞാന്‍ INSHA ALLAH അഭിപ്രായങ്ങള്‍ കുറിക്കാം

    മറുപടിഇല്ലാതാക്കൂ
  5. ലളിതവും ശക്തവുമാണ്‌ അനസിന്റെ കവിതകൾ...
    ലളിതമായ ശൈലിയിൽ വാക് കസർത്തുകളുടെ കുത്തൊഴുക്കില്ലാതെ, എന്നാൽ തീവ്രമായി വായനയിലേയ്ക്ക് വലിച്ചടുപ്പിക്കുന്ന ആകർഷണമുണ്ട് മിക്ക കവിതകളിലും അത്ര ശ്രദ്ധിക്കപ്പെടാതെ പോകുന്നതിൽ സങ്കടമുണ്ട്...

    മറുപടിഇല്ലാതാക്കൂ
  6. ഇന്നാണ് ശരിക്കും വായിക്കാന്‍ തുടങ്ങിയത് ...അനസ്‌ മാള- എനിക്ക് നന്നായി വായിച്ചറിയാം .ആ അറിവില്‍ ഞാന്‍ പലരോടും ചോദിച്ചിരുന്നു -ഈ കവിയെ ഒന്ന് പരിചയപ്പെടാന്‍ ...Alhamdu lillah.
    അല്ലാഹു എന്‍റെ പ്രിയ സുഹൃത്തിന് എല്ലാ അനുഗ്രഹങ്ങളും കനിയട്ടെ...

    മറുപടിഇല്ലാതാക്കൂ
  7. ഈ സ്നേഹത്തിന് എല്ലാവര്‍ക്കും നന്ദി!

    മറുപടിഇല്ലാതാക്കൂ